Paino-ino Samtang Ginatulok Ang Snow Nga Nagakataktak Sa Kagurazaka

 

Paino-ino Samtang Ginatulok Ang Snow Nga Nagakataktak Sa Kagurazaka

(Kaguzakara, Shinjuku, Tokyo, Japan, 28 February 2012)

By vic@purebright

Ang snow nga nagakahulog
Daw sinipad-sipad nga bulak sang doldol

Amat-amat nagakataktak,
Daw gina ili-ili kon huypon sang hangin.

Sa imo nga kaputi  kag pagliki-liki paidalum, 
Ako nakum-an kag ginpahanumdum:

Ang mga bunga sang doldol sa kilid sang balay,

Ginasingit, kon kis-a ginahulat asta mataktak,

Ginabulad, pagkatapos ginahimo nga mga ulunan ni Nanay. 

Gani, ang kalum-ok sang almuhadon

Nga akon subong ginahigdaan

Indi gid makatupong sang akon kahipay

Kon akon tani mahakos

Ang ginhimo mo nga mga ulunan, Nanay.

Malum-ok sadto kag  mahumot,

Labi nagid  kon bag-o mabulad. 

Baw, tama kasulhay unlan,
Kapin pa kon ako maghigda 
Samtang ginahuyop ang likod
Sang  malamig nga hangin 

Nga nagalusot sa salog nga kawayan.  

Ahay, kanugon, 
Kay pareho sang bulak sang doldol

Nga nagakataktak sa duta, 
Ang imo kabuhi indi na maibalik pa.

Akon na lang ikaw handurawon, 
Kag ang imo doldol nga ulunan,

Samtang akon ginatulok ang snow 
Nga nagakataktak sa Kagurazaka.