vic@purebright
(Pagkatapos Lagaw sa Karukuen Garden,
Shinjuku, Tokyo, Japan, Winter, 29 February 2012)
Bisan nagakurog ang akon kaunod-unoran
Kag nagabinhod ang mga luta-lutahan,
Ini wala sang sapayan,
Makit-an ko lamang ang imo kagayon:
Oh, Cora Queen, rayna sang snow—putli, bulahan, maugdang it panimu-ot —
Kari ka kag magkunsad sa akon Pungsod,
Indi lang sa isa ka hardin kundi sa bug-os nga kapulu-an.
Kag sa bisan makadali lang, imo likupan sing kaputli
Ang mga lubak-lubak nga mga dalanon,
Ang maangros nga mga estero,
Gurisnay nga nawong sang mga iskwater,
Kag marismo nga mga edipisyo nga ginalikupan
Sang yab-ok kag aso halin sa mga karsada kag tambutso.
Hu-o, mabudlay ang akon ginapangayo,
Pareho kabudlay sang pagbag-o sa Pungsod
Nga akon ginahangyo.
Pero sige lang, ang hadum indi dapat pagbuy-an,
Bisan pa akon nahibaluan
Nga ang imo kaputli kag kagayon
Sa darayon nga tapak, nagalamutyak
Daw pareho man sang turugban kag lamawan.
